Sögulegt baksvið þessa verkefnis er Gísla saga Súrssonar. Hún er ein af eldri Íslendingasögunum, bæði hvað varðar sögutíma og ritunartíma. Hún gerist skömmu eftir lok landnámsaldar, á seinni hluta tíundu aldar. Talið er að hún sé rituð á seinni hluta þrettándu aldar en yngsta handritið sem fundist hefur með sögunni, er frá fimmtándu öld.

Sagan fjallar um ævi og örlög Gísla Súrssonar og fjölskyldu hans. Söguþráðurinn mótast af ástum og afbrýði og afleiðingum þeirra. Það má næstum lesa söguna eins og verið væri að lesa glæpasögu ritaða á vorum tímum.

Sagan hefst í Noregi. Fljótlega flytja sögupersónurnar til Íslands og setjast að á Vestfjörðum. Þar gerist restin af sögunni og berst hún víða um firðina. Sögustaðirnir eru enn á sínum stað og auðvelt er að þekkja þá af lýsingum sögunnar. Hið hrikalega og ægifagra umhverfi er verðugt sögusvið sem eykur gildi sögunnar til muna, þótt hún sé góð fyrir. Sagan minnir á samband náttúruaflanna og fólksins sem þurft hefur að kljást við þau í gegnum tíðina.

Gísla saga Súrssonar er ekki sérlega löng og fjölda sögupersóna er stillt í hóf. Hún er nógu aðgengileg til þess að fólk sem ekki hefur sett sig inn í heim miðaldabókmennta eða fornsagna á með góðu móti að komast í gegnum hana, ekki síst ef um leshópa er að ræða.

Útdráttur úr sögunni segir þér meira um hana (rifjar upp grunnskólafræðin).
Í netversluninni okkar getur þú keypt söguna sjálfa og sitthvað fleira sem tengist verkefninu.