Í nánasta umhverfi Þingeyrar eru fjölmargir staðir sem enginn má missa af að skreppa til:

• Hrafnseyri í Arnarfirði og safnið þar. Fæðingarstaður frelsishetjunnar Jóns Sigurðssonar er opið yfir sumartímann frá afmælisdegi hans, 17. júní ár hvert. Þar er hægt að fá kaffi, kökur og minni máltíðir. Til að komast til Hrafnseyrar þarf að aka hina bröttu og krókóttu leið yfir Hrafnseyrarheiði. Úr því að yfir heiðina er komið, munar ekki miklu að skreppa u.þ.b. 40 mínútna leið að fossinum Dynjanda. Hann er fagur langt að séð en göngutúr frá bílastæðinu upp að honum er einnig fyrirhafnarinnar virði.
  
  
• Vitinn við Svalvoga er í um 20 km. fjarlægð frá Þingeyri. Hvort sem farið er akandi eða gangandi, þá er umhverfið ægifagurt. Komast má á jeppum allan hringinn fyrir nesið en þá þarf að afla sér upplýsinga um ástand vegarins fyrirfram, auk þess sem gæta þarf sjávarfalla á tilteknum kafla leiðarinnar. Hringleiðin er ekki fær fólksbílum.
  
• Skrúður, Hlíð og Ingjaldssandur.
  
                  
  Til að komast á þessa staði þarft þú að fara af vegi nr. 60 inn á veg nr.624 í átt að Núpi. Skammt frá Edduhótelinu er skrúðgarðurinn Skrúður. Þar komast áhugamenn um plöntur í feitt. Garðurinn er búinn að vera til síðan árið 1905, þegar Sigtryggur Guðlaugsson prestur bjó hann til. Enn þann dag í dag er þessi skrúðgarður gott dæmi um það sem hægt er að áorka í garðrækt á norðurslóðum. Prestsetrið Hlíð, við hliðina á hótelinu, gefur innsýn í líf fólks af millistétt um miðbik síðustu aldar. Sé ekið framhjá Núpi og yfir Sandsheiði, er komið niður á Ingjaldssand (u.þ.b. 40 mínútna akstur). Síðasti bærinn sem þú kemur að, sá sem næstur er sjónum, heitir Sæból. Þar er framleitt og selt handverk af eina íbúa staðarins. Einnig má kaupa þar kaffi og meðlæti.
  
  Meðmæli: Ingjaldssandur er einn fárra aðgengilegra staða á Vestfjörðum, þar sem hægt er að fylgjast með miðnætursólinni. Það getur borgað sig að skreppa þangað að næturlagi yfir hásumartímann.